Dear Call Center Agent,

Ang hirap ng buhay natin, no? Ngayon pa lang tayo nagsisimulang magkakilala nang mahusay, nagkakaproblema na agad tayo. Hirap pala pag nagkakilala ang dalawang tao online, tapos magkaiba pa ang oras natin.

Tulad na lang nung last tayo magkausap sa YM. Patulog ka na, kaka-online ko lang. Medyo awkward pa naman ang daloy ng usapan natin nun, pakiramdam ko napakaboring kong tao. Kaya siguro ako single for 3 years in the running.

Tapos ngayon, ang komunikasyon natin eh, via text lang, tapos ganun pa rin, patay pa rin dahil sa schedule. Magtetext ka, tulog na ko; pag magtetext ako, malamang tulog ka or nasa office na. Siguro kaya ako single pa rin kasi maaga ako matulog.

Paano pa tayo magde-date nyan? Pag rest day mo, uuwi ka pa sa probinsya, at pagbalik mo, wala ka nang lakas para makipagkita sa akin. Dapat yata umabsent ako sa trabaho para makita ka lang. Ayoko pa naman ng umaabsent. Kaya siguro single pa rin ako hanggang ngayon.

Ang gusto ko lang naman eh makausap ka nang matagal, makilala ka ng husto, makasalo sa isang simpleng hapunan, manood ng sine, tumanaw sa kawalan katabi ka. Pero eto, umaasa tayo na sana, magtugma ang ating schedule.

Di pa rin ako nawawalan ng pag-asa. Darating din ang panahon natin.

Ingat ka lagi.

Love,
Isa pang Call Center Agent